Plataforma en Defensa da Sanidade Pública

A Plataforma en Defensa da Sanidade Pública de Cangas quere facerse eco do descontento de moitos/as pacientes que acuden a radioloxía do Centro de Saúde de Cangas polo incremento das esperas, despois de que o SERGAS decidise redireccionar cara a este servizo a toda a poboación de Moaña. Isto que podería supoñer unha ventaxa para os usuarios e usuarias do concello veciño, estáse convertendo nun auténtico problema para todos ao duplicarse practicamente o número dos que acuden á unidade de raios de Cangas, que segue a contar cos mesmos recursos materiais e humanos, así como os mesmos horarios que antes de tomar unha decisión tan desacertada.
A Plataforma en Defensa da Sanidade Pública de Cangas urxe, polo tanto, ás autoridades sanitarias a que tomen as medidas adecuadas para resolver este problema, á vez que quere poñer en evidencia que no proxecto do Centro de Alta Resolución do Morrazo, prometido e paralizado neste momento polo actual goberno da Xunta, xa se contemplaba a inclusión das especialidades de radiodiagnóstico e laboratorio, configurándose como a solución de fondo a esta e outras carencias de servizos especializados para proporcionar aos/as veciños do noso concello unha atención sanitaria digna e de calidade.